ZINENTIENDO 2021

ZINENTIENDO 2021
Presentación

Trini, igual como atras mullers trans naixidas d’os anyos 40 y 50, fació treballo sexual pa sobrevivir en una sociedat que no entendeba una identidat de chenero diferent d’a normativa. Igual como tantas atras, estió engarcholada mas de cinco anyos en diferents predors de Barcelona y Huelva. Y en la transición, estió d’as primeras en sacar la cara, portiando la pancarta de capecera en la primer manifestación lgtb de Barcelona.

Daniel, gay, naixiu de 1945, pasó por qualques predor diferents y estió desterrau en aplicar-se-le la Lei de Galvans y Malfedors, en primeras, y la de Periglosidat Social dimpués. Como muitos, aprestó la suya maleta en la gabia aguardando que en morir Franco arribase l’amnistía. Y l’amnistía arribó, pero no pas pa ellas y ells.

Delia (3DM), se vido relegada a l’ostracismo en expresar dende choven una sexualidat “atipica”. Activista en la luita contra lo franquismo dende las choventutz comunistas, trobó en lo feminismo y la relación con atras mullers una vía d’escape. Fundadora d’o Movimiento Homosexual d’Aragón (MHA) en los anyos 70 estió pionera en las incipients accions pa reclamar la igualdat.

Anchel exerció dende la suya choventut la disidencia política y sexual, lo que fació que le fesen fuera de l’instituto a on que treballaba de profesor. Qui un día patió redadas policials en cines gays de Barcelona, hue ye un d’os referents d’a cultura y los movimientos socials d’a izquierda en Aragón.

Conchi perdió la casa suya y la custodia d’os suyos dos fillos quan marchó a vivir con la muller que se’n heba enamorau. Fundadora d’o colectivo de lesbianas en lo Frent Feminista, dende los años 70 ha feito un treballo sin descanso en lo movimiento feminista aragonés.

Jose Luis patió dende chiquet la represión y lo refús por la suya pluma. A “La zaragozana” la encorrió la policía, la arrestoron decenas de vegadas y s’exilió por la suya orientación sexual, pero tornó ta Zaragoza pa criar a los suyos sobrinos popiellos. Y aquí continó treballando y visibilizando-se, esdevenindo un icono en lo Barrio d’o Gancho, a on que continó embrecau en la suya vida y fiestas dica que escrabutó en 2019.

Todas ellas y totz ells son lo nuestro referent. Fan parte d’a memoria lgtb d’o nuestro país, d’o nuestro ideario colectivo. La suya luita sembró una simient que lo suyo fruito, que hue empecipiamos a cullir, se vei menazau por lo revilcar d’os movimientos totalitarios, d’o faixismo, por la violencia lgtbfobica, por lo qüestionamiento d’a diversidat d’as nuestras identidatz.

No nos podemos permitir ixuplidar-les. Ye de chusticia revivir lo suyo testimonio, la suya realidat, y remerar que lo reconoiximiento d’a diversidat nuestra en igualdat no ye estau de baldes.

Si, como decimos dende habe quince anyos, lo cine y la cultura son ferramientas de luita política, incorporemos a ixe patrimonio la memoria d’os nuestros referents locals. Porque la suya resistencia fació posible la nuestra. Porque sin ellas y ells no seríanos aquí.

Por ixo, Zinentiendo 2021 fa homenache a lo que facioron y lo que estioron. Porque asinas entendemos lo que somos y esmachinaremos lo que podemos estar.

Por ixo, d’a suya man tornamos t’as carreras.

#porloqueestietzseremos

Zinentiendo 2021

Colaboradores










Organiza:

Patrocinan:


Organización

Zinentiendo ye posible gracias a un equipo de personas que dende l’activismo preban d’entender lo mundo d’unatra manera.

Son miembros d’a organización de Zinentiendo:

 

Programación y producción:

.- Víctor Solano

.- Pepe Paz

.- Mapi Gracia

.- Nacho Pascual

 

Zinentiendo Uesca:

.- Guillermo Boix

.- Lorena Campo

.- Rebeca Serrat

 

Zinentiendo Chaca:

.- Acción Grrl Feminista

 

Zinentiendo Teruel:

.- Terqueer

 

Pero i hai muita mas chent que fan Zinentiendo posible:

Oshito Audiovisual disenya la nuestra pachina web y realiza las nuestras cortinetas.

Rafa Caballero nos ha levau ta Monzón.

Eva Cortés ha disenyau lo cartel d’ista edición.

Y tantras personas maravillosas que colaboran en cada edición, que no tenemos prous parolas pa agradeixer-les-ne…

Debant d’a COVID, te cudiamos y nos cudiamos

Por ixo, t’informamos d’o nuestro protocolo pa la XVI Edición de Zinentiendo, Muestra
internacional de Cine LGTBQI:

  • L’aforo será restrinchiu*
  • Viene-te-ne puntual, pa que podamos colocar-te con total seguridat y escusar-nos aglomeracions.
  • Fe servir la tuya careta durant la prochección. Si no en tiens, te’n podemos dar una.
  • Respeta las distancias de seguridat.
  • Si tiens calentura, tuses u te trobas malament, cudia-te, cudia-nos y esta-te en casa.

*(en función d’a situación sanitaria y las prescripcions presas por las autoridatz competents).

#laculturayesegura
#Zinentiendo2021
#porloqueestietzseremos